2025 жылдың 17 ақпанында Абай атындағы жалпы білім беретін мектеп базасында «Жаңа мектепке-жаңашыл ұстаз» VII республикалық байқауының қалалық кезеңі өтті. Биылғы сайысқа еңбек өтілі 3 жылға дейінгі 20 жас педагог қатысып, өз кәсіби қабілеттерін көпшілікке таныстырды. Қазылар алқасы қатысушылардың шығармашылық ойлау қабілетіне, оқу процесіне инновациялық әдістерді енгізу деңгейіне және сандық ресурстарды тиімді қолдану шеберлігіне ерекше назар аударды. Байқау барысында жас мұғалімдер заманауи педагогиканың үздік тәжірибелерін ұсынып, пәндерді оқытудың жаңа үлгілерін көрсетті. Нәтижесінде №15 мектептің қазақ тілі және әдебиеті пәні мұғалімі Ғалымжан Нұрайлым Кәдіржанқызы жүлделі екінші орынды иеленді. Қазылар педагогтың жаңа әдістемелерді ұтымды қолдануы, цифрлық құралдарды сабақта тиімді кіріктіре білуі мен кәсіби шеберлігін ерекше атап өтті. Ұйымдастырушылар жас педагогтардың білім беру саласына тың серпін әкеліп отырғанын айтып, барлық қатысушыларға шығармашылық табыс тіледі. Байқау жас мұғалімдер үшін тәжірибе алмасып, жаңашыл идеяларды ортаға салуға мүмкіндік берген маңызды алаң болды.
