Мектебіміздің 5 және 7 сынып оқушылары бүгін «Шоқан. Қашқария сапары» атты анимациялық мультфильмді тамашалап, қазақтың ұлы ғалымы Шоқан Уәлихановтың тарихи экспедициясымен танысты. Көрсетілім балалардың тарихқа деген қызығушылығын оятуды және зерттеушінің өмір жолын кеңірек түсіндіруді мақсат етті.
Мультфильм сюжеті 8 жасар Азат есімді баланың уақыт ішінде өткенге тап болуынан басталады. Ол 1858 жылға өтіп, Шоқан Уәлихановтың Қашқарияға жасаған әйгілі ғылыми сапарына қосылады. Көрермендер Орталық Азияның мәдениеті мен табиғаты жайлы әсерлі көріністерді тамашалап, сол кезеңнің тарихи шындығымен жақынырақ танысты.
Көрсетілім барысында оқушылар тек оқиғаның желісін бақылап қана қоймай, батылдықтың, білімге деген құштарлықтың және зерттеушілік рухтың маңызын ұғынды. Көңілді әрі мазмұнды туынды олардың шабыттанып, өз ой-пікірлерін бөлісуіне мүмкіндік берді.
Мұғалімдердің айтуынша, мұндай танымдық мультфильмдер жас буынның тарихи тұлғаларға деген қызығушылығын арттырып, еліміздің өткенін жаңаша қырынан тануға сеп болады. Тарихты түсінудің өзі болашаққа сенімді қадам жасаудың бір бөлігі екені атап өтілді.
